Lajme

Nis vaksinimi me dozën e tretë për personelin mjekësor, Manastirliu inspekton procesin

Ka nisur ditën e sotme vaksinimi me dozën e tretë e mjekëve shqiptarë. Ministrja e Shëndetësisë dhe Mbrojtjes Sociale, Ogerta Manastirliu ka ndjekur nga afër procesin e vaksinimit në “Air Albania” të mjekëve të parë që kanë nisur vaksinimin me dozën e tretë.

“Kemi filluar menjëherë me grupet që janë më të rrezikuara, që janë mjekët, infermierët dhe sot në të gjithë qendrat shëndetësore aty ku mjekët, infermierët punojnë, por edhe gjithashtu në strukturat tona të vaksinimit të përqendruar tashmë ka filluar vaksinimi me dozën e tretë booster për personelin mjekësor. Nga ana tjetër paralelisht ka filluar vaksinimi me dozën booster për të gjithë ata qytetarë të grupmoshës +60 vjeç dhe sigurisht për +18 vjeç me problematika shëndetësore”, tha Manastirliu.

Ndërkohë që Drejtoresha e ISHP, Albana Fico dhe Rektori i Universitetit të Mjekësisë, Prof. Arben gjata kanë bërë thirrje qytetarëve që të vaksinohen.

“Ne jemi shumë të interesuar që çdo qytetar i cili nuk e ka kryer vaksinën duhet të vijë, të fillojë me procesin e vaksinimit, sepse ndërkohë që ne shkojmë përpara për mbrojtjen e mëtejshme të popullatës është tejet e rëndësishme të rritet numri i të vaksinuarve për të parandaluar problematika me viruse ose shtame të reja”, tha Fico.

“Fakti që sot shumë prej mjekëve po vaksinohen për herë të tretë pikërisht tregon që vaksina është masa më e mirë mbrojtëse dhe derisa janë mjekët që pranojnë të vaksinohen, ju bëjmë thirrje të gjithë qyetearëve të vaksinohen sepse është e vetmja mënyrë që ulë në maksimum risqet që sjellë kjo sëmundje e rëndë”, deklaroi Gjata.

Aplikimi i dozës së tretë ‘booster’ do të bëhet për stafet mjekësore, për personat që jetojnë në institucione të kujdesit afatgjatë, për të gjithë personat mbi 60 vjeç me sëmundje kronike. Doza booster duhet të ofrohet jo më parë se 6 muaj pas përfundimit të vaksinimit me dozën e dytë.

Dozë të tretë do të marrin edhe personat me frenim të imunitetit, sipas rekomandimit të mjekut të familjes. Sipas udhëzimit të ISHP, vaksinimi ka nisur edhe për fashën 12-15 vjeç me sëmundje kronike dhe frenim të imunitetit si dhe për grupmoshën 16-18 vjeç.

Related Articles

Leave a Reply

Your email address will not be published. Required fields are marked *

Back to top button