Një 22-vjeçare ka rënë në prangat e policisë, pasi në makinën e saj janë gjetur sasi kanabisi të ndara në doza. Ndërsa, shoqëruesit të saj, 20 vjeç, u konstatua me një sasi të vogël lënde narkotike.
Sakaq, gjatë kontrolleve në shtëpinë e saj, të resë i është sekuestruar edhe një peshorja elektronike dhe një celular.
Njoftimi i Policisë:
U kap në flagrancë teksa drejtonte një automjet ku mbante sasi kanabisi të ndarë në doza, me qëllim shitjen, vihet në pranga një shtetase. Në banesën e saj u gjet një peshore elektronike që i shërbente kësaj veprimtarie kriminale.
Procedohet penalisht një 20-vjeçar, pasagjer në këtë automjet, pasi u kap me një sasi lënde narkotike.
Sekuestrohen dozat e lëndës narkotike, peshorja elektronike dhe një celular.
Specialistët e Seksionit për Hetimin e Trafiqeve të Paligjshme dhe Narkotikëve, në vijim të punës për parandalimin, evidentimin dhe goditjen e veprimtarisë kriminale të shpërndarjes së lëndëve narkotike në doza, të mbështetura dhe nga inteligjenca informative, konstatuan dhe goditën një rast tjetër në këtë fushë.
Për këtë rast, u arrestua në flagrancë shtetasja G. M., 22 vjeçe, si dhe u referuan materialet në Prokurori ku nisi procedimi në gjendje të lirë për shtetasin E. Q., 20 vjeç, të dy banues në Vlorë.
Shërbimet e Policisë ndaluan për kontroll automjetin me drejtuese 22-vjeçaren dhe ku ishte pasagjer shtetasi E. Q. Gjatë kontrollit në këtë automjet, u gjet një sasi lënde e dyshuar narkotike kanabis, e ndarë në doza, të gatshme për shitje, si dhe u konstatua 20-vjeçari me një sasi të vogël lënde narkotike.
Në vijim të veprimeve procedurale, u ushtrua kontroll në banesën e shtetases G. M., ku u gjet një peshore elektronike që i shërbente veprimtarisë kriminale të ndarjes së lëndës narkotike në doza, me qëllim shitjen./abcnews.al
