Arrestohen kryeplaku dhe i biri i fshatit në Shkodër
Kryeplaku i fshatit Pepsumaj, në Shkodër, Ndue Fiku, së bashku me djalin e tij Mark Fiku, janë arrestuar nga Agjencia e Mbikëqyrjes Policiore si të përfshirë në kultivimin e knabisit në zonë.
Përmes një komunikate për media AMP bën me dije se ka dokumentuar me prova ligjore përfshirjen e kryeplakut dhe djalit të tij në aktivitetin kriminal të kultivimit të bimëve narkotike.
Kryeplaku 70-vjeçar akuzohet për kryerjen e veprës penale të “Kultivimit të bimëve narkotike“ dhe “Shpërdorimit të detyrës“.
Sakaq i biri akuzohet për kryerjen e veprës penale të “Kultivimit të bimëve narkotike” në bashkëpunim.“Agjencia e Mbikëqyrjes Policore (Rajoni Shkodër-Lezhë) ekzekutoi urdhrin e prokurorit mbi vendimin penal të Gjykatës së Shkallës së Parë të Juridiksionit Përgjithshëm Shkodër për caktimin e masës së sigurimit personal “Arrest në burg”, në bazë të hetimeve të thelluara nga AMP-ja, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Shkodër, në funksion të hetimit të procedimit penal të vitit 2023, regjistruar për veprat penale “Kultivimi i bimëve narkotike” dhe “Shpërdorimi i detyrës”.
Sa më sipër, Agjencia e Mbikëqyrjes Policore ka bërë të mundur dokumentimin me prova ligjore të përfshirjes në këtë aktivitet kriminal të kultivimit të bimëve narkotike nga shtetasit:
– N. F., 70 vjeç, me detyrë Kryeplak i zonës Pepsumaj, i dyshuar për kryerjen e veprës penale të “Kultivimit të bimëve narkotike“ dhe “Shpërdorimit të detyrës“.
– M. F., 31 vjeç, i dyshuar për kryerjen e veprës penale të “Kultivimit të bimëve narkotike” në bashkëpunim”, njofton AMP.